A Universidade de Vigo a través do seu grupo de investigación en Xeotecnoloxías Aplicadas participa nun consorcio internacional formado por 16 entidades de 10 países para a presentación do proxecto "MOVEO. Intelligent Framework for Inclusive and Seamless Transport Infrastructure and Mobility Services" dentro da convocatoria HORIZON-CL5-2024-D6-01-08 do programa marco Horizon Europe.
O proxecto MOVEO aborda o reto de mellorar a eficiencia, seguridade e sustentabilidade ambiental das infraestruturas de transporte e servizos de mobilidade. Propón un marco intelixente escalable que emprega tecnoloxías dixitais avanzadas para integrar infraestruturas e medios de transporte, mellorando a xestión de activos, optimizando a capacidade multimodal e reducindo emisións.
MOVEO céntrase na seguridade, accesibilidade e inclusión, e estrutúrase en cinco piares clave: avaliación e redeseño de infraestruturas, inspección e monitorización, mobilidade dixitalizada, loxística intelixente e inclusión e accesibilidade. Validarase en cinco demostradores en diferentes rexións da UE, abordando os desafíos actuais e preparando o camiño para un transporte máis conectado, sustentable e seguro.
A solicitude conta co respaldo económico da universidade a través da súa convocatoria de Axudas Propias á Investigación, dentro do apartado para a preparación de proxectos internacionais de I+D+i.
A resolución dos proxectos finalmente seleccionados está prevista para o comezo do ano 2025.